इन्द्रेणीपोष्ट
काठमाडौँ, १३ साउन – हाल देशभर सक्रिय मनसुनी प्रणालीको प्रभाव कायमै रहेको जल तथा मौसम पूर्वानुमान महाशाखाले जनाएको छ । महाशाखाका अनुसार मनसुनको न्यून चापीय रेखा पश्चिममा सरदर स्थानको आसपास र पूर्वमा सरदर स्थानभन्दा उत्तरतर्फ रहेको छ, जसको कारण देशका विभिन्न भागमा बदली र वर्षाको अवस्था देखिएको छ ।
आज दिउँसो देशभर सामान्य बदली रहनेछ भने कोशी, बागमती र लुम्बिनी प्रदेशका पहाडी भू–भागहरूमा मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ । त्यस्तै, कोशी, बागमती र गण्डकी प्रदेशका पहाडी क्षेत्रका एक(दुई स्थानमा भारी वर्षा हुने सम्भावना पनि रहेको छ।
आज राति लुम्बिनी प्रदेशलगायत देशका पहाडी भू–भागहरूमा सामान्य बदली रहनेछ भने बाँकी तराई भू–भागहरूमा आंशिक बदली रहनेछ । रातको समयमा पनि केही पहाडी क्षेत्रहरू र तराईका एक(दुई स्थानमा मेघगर्जन र चट्याङसहित मध्यम वर्षाको सम्भावना छ ।
महाशाखाले सम्भावित भारी वर्षालाई ध्यानमा राख्दै पहिरो, बाढी र यातायातमा अवरोध हुनसक्ने भन्दै सतर्कता अपनाउन सबैलाई आग्रह गरेको छ ।
सोमबार, साउन १९ गते २०८२
Aug 04 2025 Monday
