इन्द्रेणीपोष्ट
गत आर्थिक वर्ष २०८१।८२ मा सिमीजोनको रूपमा चिनिएको मुगु जिल्लाबाट ७४ मेट्रिक टन सिमी अन्य जिल्लामा बिक्री भएको छ । जिल्ला कार्यान्वयन कार्यालयका अनुसार उक्त सिमी बिक्रीबाट किसानहरूले लाखौं रुपैयाँ आम्दानी गरेका हुन् । तर, बजार पहुँच र यातायातको असुविधाका कारण किसान अझै पनि उचित मूल्यबाट वञ्चित हुने अवस्था यथावत् रहेको बताइएको छ ।
राष्ट्रिय कृषि आधुनिकीकरण कार्यक्रम कार्यान्वयन इकाइ मुगुका निमित्त प्रमुख तेज विक्रम मल्लका अनुसार जिल्लाबाट मात्रै सिमीबाहेक चिनो, काउनो, रातो चामल, तितेफापर, मिठेफापर, नाफल, जौँ जस्ता परम्परागत बालीसमेत गरी करिब रु ४ करोड बराबरको अन्न बाह्य जिल्लामा बिक्री भएको छ ।
कार्यक्रमले सिमी ढुवानीमा किसानलाई ५० प्रतिशत अनुदान दिएर सहयोग गरे पनि अन्य बालीका लागि यस्तो व्यवस्था नगर्दा उत्पादनको सदुपयोगमा चुनौती रहँदै आएको छ । गतआवमा सिमी ढुवानीका लागि रु ४ लाख ९० हजार अनुदान दिइएको थियो भने चालु आवमा सिमीका लागि रु ५ लाख र अन्य बालीका लागि रु ३ लाख विनियोजन गरिएको छ ।
यसैबीच, चालु आवमा ८० मेट्रिक टन सिमी बिक्री गर्ने लक्ष्य लिएको कार्यालयले जानकारी दिएको छ । तर, सडक र बजार पहुँच अभावका कारण किसानले गाउँमै सस्तो मूल्यमा बाली बेच्नुपर्ने बाध्यता टरेको छैन ।
कृषि क्षेत्रका जानकारहरू भन्छन्—सरकारले बजार विस्तार र ढुवानीमा थप लगानी नगरे परम्परागत बालीको सम्भावना जति भए पनि ग्रामीण विकासमा योगदान दिन सक्दैन ।
सोमबार, साउन १९ गते २०८२
Aug 04 2025 Monday
