इन्द्रेणीपोष्ट
सिरहा, १४ साउनः सिरहा जिल्लाको धनगढीमाई नगरपालिका–११ आमचोकमा ८० वर्षीय फनिलाल यादवको रहस्यमय परिस्थितिमा धारिलो हतियार प्रहार गरी हत्या गरिएको छ । यादव आफ्नै घरमा सुतिरहेको अवस्थामा मङ्गलबार राति अज्ञात समूहको आक्रमणमा परेका हुन् ।
मृतकका छोरा कपिलदेव यादवका अनुसार राति सुतिरहेकै बेला टाउकोमा धारिलो हतियारले प्रहार गरिएको अनुमान गरिएको छ । “बिहान अबेरसम्म नउठेपछि खोज्दा बुबालाई रगताम्य अवस्थामा गम्भीर घाइते फेला पार्यौँ,” कपिलदेवले भने । तत्काल लहानस्थित प्रादेशिक अस्पतालमा उपचारका लागि लगिए पनि उनको मृत्यु भएको जिल्ला प्रहरी कार्यालयका प्रहरी नायब उपरीक्षक डीएसपी वीरेन्द्रकुमार पासवानले जानकारी दिएका छन ।
घटनापछि प्रहरी ढिलो आएको भन्दै आक्रोशित स्थानीय बासिन्दाले पूर्व–पश्चिम राजमार्ग अन्तर्गत धनगढी बजार क्षेत्रमा टायर बालेर करिब एक घण्टा सडक अवरुद्ध गरेका थिए ।
प्रहरीका अनुसार प्रारम्भिक अनुसन्धानमा यो हत्या पारिवारिक विवाद वा पुरानो झगडासँग सम्बन्धित हुन सक्ने अनुमान गरिएको छ । “घटनाको गम्भीरताका साथ अनुसन्धान भइरहेको छ । दोषी पत्ता लगाउन विशेष टोली परिचालन गरिएको छ,” डीएसपी पासवानले भने ।
स्थानीय बासिन्दाले हत्या घटनाले क्षेत्रको सुरक्षाप्रति गम्भीर प्रश्न उठाएको भन्दै दोषीलाई चाँडो भन्दा चाँडो कानुनी दायरामा ल्याउन माग गरेका छन् ।
आइतबार, साउन १८ गते २०८२
Aug 03 2025 Sunday
