इन्द्रेणीपोष्ट
काठमाडौँ, १३ साउनः नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल ‘प्रचण्ड’ले सामाजिक सङ्घसंस्थाका माध्यमबाट पार्टीलाई जनस्तरमा मजबुत बनाउने अभियानमा सक्रिय हुनुपर्नेमा जोड दिएका छन ।
आज माओवादी केन्द्रको समाज कल्याण विभागद्वारा आयोजित ‘सामाजिक न्याय, समावेशिता र सामाजिक सङ्घसंस्थाको भूमिका’ विषयक छलफल कार्यक्रममा अध्यक्ष दाहालले बदलिँदो राजनीतिक परिस्थितिमा यस्ता संस्थामा माओवादीको उपस्थिति र हस्तक्षेप सकारात्मक ढङ्गबाट हुनु जरुरी रहेको स्पष्ट पारे ।
उनले माओवादीका नेता तथा कार्यकर्ता विभिन्न सामाजिक संस्थामा संलग्न भए पनि पहिचान खुलाउन नचाहने प्रवृत्ति त्याग्नुपर्ने बताउँदै भने, “जहाँ जहाँ हाम्रा साथीहरू छन्, ती संस्था जनमुखी र उत्कृष्ट बन्नुपर्छ । पार्टीको नीति र सोच जनतामाझ मात्रै होइन, संगठनको तल्लो तहसम्म स्पष्ट हुनु आवश्यक छ।”
अध्यक्ष दाहालको निजी सचिवालयका अनुसार माओवादी केन्द्रले अघि सारेको स्वतन्त्र र राष्ट्रिय अर्थतन्त्रको अवधारणा अन्य दलहरूको सोचभन्दा पृथक रहेको उल्लेख गर्दै उनले त्यस अवधारणालाई सामाजिक संस्थामार्फत जनतामाझ प्रभावकारी ढङ्गले स्थापित गर्नुपर्ने धारणा राखेका छन ।
आइतबार, साउन १८ गते २०८२
Aug 03 2025 Sunday
