इन्द्रेणीपोष्ट
खलङ्गा, १९ साउनः भारतले नेपालसँग सीमा जोडिएको धौलिगङ्गा जलविद्युत् परियोजनाको बाँधको ढोका खोल्ने तयारी गरेपछि महाकाली नदी किनारका बासिन्दालाई सतर्क रहन आग्रह गरिएको छ ।
दार्चुलास्थित जिल्ला प्रशासन कार्यालयका अनुसार भारतको उत्तराखण्डस्थित धौलिगङ्गा जलविद्युत् परियोजनाले सिल्ट सफाइका लागि साउन २० गते बिहान ६ बजेदेखि २१ गते बिहान ६ बजेसम्म बाँधको ढोका खोल्ने जानकारी दिएको हो ।
सहायक प्रमुख जिल्ला अधिकारी मोहनसिंह धामीद्वारा जारी सूचनामा सो अवधिमा नदीमा माटो, बालुवा लगायतका पदार्थ बग्ने भएकाले जलस्तर असामान्य रूपमा बढ्न सक्ने उल्लेख गरिएको छ । त्यसैले महाकाली नदी तटीय क्षेत्रका बासिन्दालाई सतर्कता अपनाउन र आवश्यक सावधानी अपनाउन आग्रह गरिएको छ ।
सोमबार, साउन १९ गते २०८२
Aug 04 2025 Monday
