इन्द्रेणीपोष्ट
झापा, १ भदौ – झापाको कनकाई नगरपालिका–४ स्थित कन्काई घाटमा विद्युतीय शवदाह गृह निर्माण सम्पन्न भएको छ ।
कोशी प्रदेश सरकार, कनकाई नगरपालिका र विभिन्न दाताको सहयोगमा रु दुई करोड ३० लाखमा निर्माण भएको यस शवदाह गृहमा प्रदेश सरकारले रु दुई करोड, नगरपालिकाले रु २० लाख र दाताले रु १० लाख लगानी गरेको छ ।
कनकाई नगरपालिकाका प्रमुख राजेन्द्रकुमार पोखरेलले शवदाह गृह सञ्चालन नगरपालिकाले गर्ने गरी प्रदेश सरकारसँग सम्झौता भएको जानकारी दिएका छन । उनका अनुसार “सञ्चालनका लागि कार्यविधि तयार पारिसकिएको छ र एक हप्ताभित्रै विधिवत सञ्चालन हुने तयारी भइरहेको छ।”
कन्काई घाट व्यवस्थापन समितिका महासचिव गोपाल खरेलका अनुसार भारतीय प्राविधिक टोलीले निर्माण सम्पन्न गरेर फर्किसकेको छ । परीक्षणका क्रममा ८० वर्षीया हेमती राजवंशीको शव दहन गरिएको थियो । विद्युतीय शवदाह गृहबाट एउटा शव दहन हुन करिब ५० मिनेट लाग्ने छ, जबकि दाउराले दहन गर्दा ३–३५ घण्टा लाग्छ ।
कोशी प्रदेश सरकारले आर्थिक वर्ष २०८१।८२ मा कनकाई नदीमा विद्युतीय शवदाह गृह निर्माणका लागि रु दुई करोड विनियोजन गरेको थियो ।
निर्माणपछि स्थानीयस्तरमा उठेको माग सम्बोधन भएको छ । विद्युतीय शवदाह गृह सञ्चालनमा आएपछि दाउरा र समयको बचत हुने र वातावरण संरक्षणमा मद्दत पुग्ने अपेक्षा गरिएको छ ।
कनकाई घाट २०६७ मा स्थापना भएको हो र हाल पाँचवटा चितास्थल सञ्चालनमा छन् ।
आइतबार, भदौ १ गते २०८२
Aug 17 2025 Sunday
