पाँचथर, २५ साउनः युवा तथा खेलकुदमन्त्री तेजुलाल चौधरीले दशौं राष्ट्रिय खेलकुद प्रतियोगिताको मिति चाँडै घोषणा हुने बताएका छन् । प्रतियोगिता सञ्चालनका लागि सबै पक्षसँग छलफल भइरहेको र अब परिवर्तन नहुने गरी मिति तय गरिने उनले स्पष्ट पारे ।
आज पाँचथरको फिदिममा जिल्ला खेलकुद विकास समितिले आयोजना गरेको पत्रकार सम्मेलनमा मन्त्री चौधरीले सुर्खेतमा हुने प्रतियोगिताका लागि कर्णाली प्रदेश सरकारसँग सक्रिय छलफल भइरहेको बताए । उनले मुख्यमन्त्रीसहित सबै सरोकारवालासँग परामर्श भइरहेको र प्रधानमन्त्रीको पनि चासो रहेको बताए ।
मन्त्री चौधरीले नेपाल प्रिमियर लिग एनपीएलको पहिलो संस्करण सञ्चालनमा देखिएका वित्तीय, प्राविधिक तथा व्यवस्थापकीय पक्षको अध्ययनका लागि छानबिन समिति गठन हुने जानकारी दिए । उनले प्रतियोगिता मौजुदा कानुनअनुसार सञ्चालन गर्न आग्रह गर्दै मन्त्रालयले आवश्यक सहयोग गर्ने बताए ।
उनका अनुसार खेलकुद संरचना निर्माणका लागि पर्याप्त जग्गा अभाव देखिएको छ र प्राप्त जमिनमा पनि बजेटको कमीका कारण काम सुस्त भएको छ । स्थानीय तहले समेत जग्गा व्यवस्थापनमा सहयोग गर्नुपर्ने आवश्यकता उनले औंल्याए ।
मन्त्री चौधरीले प्रदेश र स्थानीय तहमा खेलकुद कर्मचारी पठाउने तयारी भइरहेको र त्यसका लागि सङ्गठन तथा व्यवस्थापन सर्वेक्षण भदौभित्र सम्पन्न हुने बताए । साथै, अलपत्र बनेको फिदिम रङ्गशालालाई बहुवर्षीय ठेक्कामा रुपान्तरण गरी बजेटको अभाव हुन नदिने प्रतिवद्धता समेत जनाए ।
जिल्ला खेलकुद विकास समितिका अनुसार रु १० करोड ६३ लाख ७५ हजार लागतको रङ्गशाला निर्माणको ठेक्का विसं २०७७ फागुनमा पिएस किरातेश्वर मैनाचुली जेभीलाई दिइएको थियो । २०७९ असार १५ सम्म सम्पन्न गर्नुपर्ने भए पनि हालसम्म जम्मा ३१।७५ प्रतिशत मात्रै भौतिक प्रगति भएको छ ।