इन्द्रेणीपोष्ट
काठमाडौँ, २७ साउनः अख्तियार दुरुपयोग अनुसन्धान आयोगले रुपन्देहीको कोटहीमाई गाउँपालिका –५ स्थित सशस्त्र प्रहरी बल नेपाल बार्डर आउट पोस्ट मझगावामा कार्यरत जवान यामबहादुर खत्रीलाई घुससहित पक्राउ गरेको छ ।
आयोगका अनुसार सीमा पारी भारतबाट भन्सार छली अवैध रुपमा कपडा तथा किराना सामान ल्याउन सहजीकरण गरिदिने भन्दै सेवाग्राहीसँग रु १५ हजार घुस लिँदै गरेको अवस्थामा उनलाई पक्राउ गरिएको हो । बुटवल कार्यालयबाट गएको टोलीले खत्रीलाई घटनास्थलमै नियन्त्रणमा लिएको हो ।
आयोगका प्रवक्ता राजेन्द्रकुमार पौडेलका अनुसार आरोपी खत्रीलाई नियन्त्रणमा लिएर थप अनुसन्धान भइरहेको छ ।
यसैबीच, आयोगले सोमबार नापी कार्यालय कलङ्कीका कार्यालय सहयोगी एकेन्द्र कुँवरलाई पनि रु १३ हजार घुससहित पक्राउ गरेको छ । उनले चन्द्रागिरि नगरपालिका –१३ को जग्गा हालसाविक गरी नयाँ पुर्जा बनाउने प्रयोजनका लागि सेवाग्राहीसँग घुस मागेको आरोप छ ।
आयोगको केन्द्रीय कार्यालय टङ्गालबाट गएको टोलीले कुँवरलाई पक्राउ गर्दा कार्यालय प्रमुखको दुई थान मोबाइल, सर्भेक्षकको एक थान मोबाइल र कुँवरको एक थान मोबाइल बरामद गरेको छ । आरोपी कुँवरमाथि पनि थप अनुसन्धान भइरहेको आयोगले जनाएको छ ।
मंगलबार, साउन २७ गते २०८२
Aug 12 2025 Tuesday
