सिरहा, २६ साउन — सिरहा र धनुषा जिल्लालाई जोड्ने कमला नदीमाथिको पक्की पुल १४ वर्षसम्म पनि अधुरै रहेको छ । विसं २०६८ मा तीन वर्षमै सम्पन्न गर्ने लक्ष्यसहित सुरु गरिएको ४६९ मिटर लामो पुल अझै निर्माण सम्पन्न नहुँदा स्थानीयवासी वर्षौंयता सास्ती भोग्न बाध्य छन् ।
पुल नबन्दा आवतजावतका लागि अस्थायी रूपमा बनाइने बाँस वा काठको पुलमार्फत जोखिमपूर्ण यात्रा गर्नुपर्ने बाध्यता छ । यही साउनको तेस्रो हप्तामा आएको बाढीले बाँसको पुल बगाएपछि यातायात ठप्प भएको थियो । हाल पुनः काठको संरचना बनाएर केही सहजता आए पनि जोखिम यथावत् छ ।
सिरहा–६ का प्रवीण यादवका अनुसार पुल नहुँदा मोटरसाइकलसहित यात्रा गर्दा डर लाग्ने मात्र होइन, यात्रुहरूमाथि मनपरी शुल्क पनि असुल्ने गरिएको छ । नगरपालिकाले निःशुल्क सञ्चालनको दाबी गरे पनि व्यवहारमा रु ५० सम्म तिर्नुपरेको उनको भनाइ छ ।
पुल निर्माणको जिम्मा सुरुमा पप्पु–लुम्बिनी जेभीलाई दिइएको थियो । पप्पु कन्स्ट्रक्सन कालोसूचीमा परेपछि बाँकी काम लुम्बिनी बिल्डर्सले गर्दै आएको हो । तर बाढीले दुई पाया भासिएपछि आवश्यक मर्मतका लागि आठ करोडको बिमा रकम नपाएको भन्दै कम्पनीले पछिल्लो एक महिनादेखि काम रोकिदिएको छ ।
हुलाकी राजमार्ग निर्देशनालय योजना कार्यालय जनकपुरका सूचना अधिकारी इञ्जिनियर रञ्जितकुमार रायका अनुसार, तोकिएको म्यादमै काम रोकेकाले लुम्बिनी बिल्डर्सलाई पनि कालोसूचीमा राख्ने प्रक्रिया सुरु भएको छ । पुल अधुरो रहँदा वर्षायाममा स्थानीयलाई डुङ्गा चढेर वा बाँसको भ¥याङमार्फत नदी पार गर्नुपर्ने चुनौती दोहोरिँदो छ ।