इन्द्रेणीपोष्ट
सुदूरपश्चिम, २६ साउनः कैलाली कारागारमा कैदीबन्दीबीच भएको झडपमा परी मृत्यु भएका धनगढी उपमहानगरपालिका–४ का ३६ वर्षीय भरत चौधरीको शव परिवारले आज बुझेका छन् । प्रमुख जिल्ला अधिकारीमार्फत राखिएका माग सुनुवाइ हुने प्रतिबद्धतापछि मृतकका परिवार शव बुझ्न सहमत भएका हुन् ।
प्रशासकीय अधिकृत शिवराज जोशीका अनुसार मृतक परिवारका केही माग प्रदेश सरकारले सम्बोधन गर्ने र मृतकका बच्चालाई निःशुल्क पढाउने विषयमा सम्बन्धित निकायमा पहल गर्ने आश्वासन दिइएको छ । परिवारले दोषीमाथि कारबाही र क्षतिपूर्ति माग गर्दै शव बुझ्न इन्कार गर्दै आएका थिए ।
सुदूरपश्चिम प्रदेश सरकारले आइतबार साँझ मृतकका परिवारलाई रु पाँच लाख सहयोग दिने निर्णय गरेको थियो। गत शुक्रबार राति कारागारभित्र भएको झडपमा घाइते भएका चौधरीको उपचारका क्रममा मृत्यु भएको हो ।
उक्त घटनामा घाइते भएका अन्य ४५ जनाको सेती प्रादेशिक अस्पतालमा उपचार भइरहेको छ भने गम्भीर घाइते कर्ण सलामीमगर र आयुस भट्टको काठमाडौँमा उपचार भइरहेको छ । अर्का घाइते कल्पेस विष्टलाई पनि आज थप उपचारका लागि काठमाडौँ सिफारिस गरिएको छ ।
घटनापछि कारागार व्यवस्था विभागले जालान्दर भुसाललाई कैलाली कारागारमा खटाएको छ । घटनाको छानबिनका लागि सहायक प्रमुख जिल्ला अधिकारी किरण जोशीको संयोजकत्वमा समिति गठन गरिएको छ र कारागारको अवस्था सामान्य बन्दै गएको बताइएको छ ।
मंगलबार, साउन २७ गते २०८२
Aug 12 2025 Tuesday
