इन्द्रेणीपोष्ट
काठमाडौँ, ६ भदौः देशभर डेङ्गी सङ्क्रमण बढ्दै गएको छ । इपिडिमियोलोजी तथा सरुवा रोग नियन्त्रण महाशाखाका अनुसार हालसम्म ७४ जिल्लाका ३ हजार २४७ जनामा डेङ्गी सङ्क्रमण पुष्टि भएको छ । पछिल्लो एक सातामा मात्रै २११ जना नयाँ संक्रमित थपिएका छन् भने दुई जनाको ज्यान गइसकेको छ ।
प्रदेशगत सङ्ख्यामा गण्डकी प्रदेशमा सबैभन्दा बढी ९१४ जना सङ्क्रमित छन् । त्यस्तै बाग्मतीमा ६७५, कोशीमा ५६८, लुम्बिनीमा ५५१, सुदूरपश्चिममा ३८४, कर्णालीमा ९३ र मधेस प्रदेशमा ६२ जनामा डेङ्गी देखिएको छ ।
पानी जम्ने ठाउँमा एडिज एजिप्टी र एडिस एल्बोपिक्टस प्रजातिका लामखुट्टेबाट फैलिने डेङ्गी नियन्त्रणका लागि सरकारले हरेक शुक्रबार “लामखुट्टे खोज तथा नष्ट अभियान” सञ्चालन गर्दै आएको छ ।
गत वर्ष डेङ्गी सङ्क्रमण ७६ जिल्लामा फैलिँदा १५ जनाको मृत्यु हुनुका साथै ४१ हजार ८६५ जना संक्रमित भएका थिए ।
शुक्रबार, भदौ ६ गते २०८२
Aug 22 2025 Friday
