ठगीको अभियोगमा दुई पक्राउ

460

काठमाडौँ, १० भदौः वैदेशिक रोजगारीका नाममा रकम ठगी गरेको अभियोगमा दुई जना पक्राउ परेका छन् ।
पक्राउ पर्नेमा स्याङ्जा, पुतलीबजार नगरपालिका–१ का २८ वर्षीय सुसन ताम्राकार र काठमाडौँ महानगरपालिका–१५ का ५० वर्षीय योगेन्द्र घले रहेका छन् ।
प्रहरीका अनुसार सुसनले इजरायल पठाइदिन्छु भन्दै एक पीडितबाट रु १२ लाख उठाएका थिए भने योगेन्द्रले जापान पठाइदिन्छु भन्दै अर्का एक पीडितबाट रु ६ लाख लिई सम्पर्कविहीन भएका थिए ।
पीडितको उजुरीका आधारमा काठमाडौँ उपत्यका अपराध अनुसन्धान कार्यालय, टेकुबाट खटिएको टोलीले सुसनलाई आइतबार काठमाडौँ महानगरपालिका–९ बाट र योगेन्द्रलाई सोमबार काठमाडौँ महानगरपालिका–१० बाट पक्राउ गरेको हो ।
दुवैजनालाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ ।