इन्द्रेणीपोष्ट
मुस्ताङ, २ भदौः राष्ट्रिय कृषि आधुनिकीकरण परियोजना अन्तर्गत सञ्चालित च्याङ्ग्रा जोन कार्यक्रममा हालसम्म ७८ वटा कृषि तथा पशु फार्म, समूह, सहकारी र निजी कम्पनी सूचीकृत भएका छन् ।
जिल्लामा करिब ५६ हजार च्याङ्ग्रा भए पनि सूचीकृत फार्ममार्फत १९ हजार ९९४ मात्र च्याङ्ग्रा पालन भइरहेका छन् । यो संख्या जिल्लामा भएका कुल च्याङ्ग्रापालनको करिब ३३ प्रतिशत हो । सूचीकृतमध्ये १२ हजारभन्दा बढी माउ च्याङ्ग्रा रहेका छन् ।
कार्यालयका प्रमुख भरत गौतमका अनुसार बारागुङ मुक्तिक्षेत्र, लोघेकर दामोदरकुण्ड र लोमान्थाङ गाउँपालिकाका १५ वटा वडाका किसान मात्रै जोनमा आबद्ध छन् । तर घरपझोङ र थासाङ गाउँपालिकाबाट हालसम्म कसैले पनि आवेदन दिएका छैनन् ।
जोनमा सूचीकृत हुन बाँकी किसानले संस्था दर्ता र स्थानीय तहको सिफारिसमार्फत जुनसुकै बेला नाम दर्ता गर्न सक्ने व्यवस्था रहेको कार्यालयले जनाएको छ ।
मुस्ताङबाट बर्सेनि १० देखि २० हजारको हाराहारीमा च्याङ्ग्रा बिक्रीका लागि बाहिर पठाइन्छ । जोनमा आबद्ध किसानका च्याङ्ग्रा वार्षिक करिब पाँच हजार बाहिरिने गरेको तथ्याङ्कमा उल्लेख छ ।
यहाँका किसानले मुख्यतया मासुका लागि च्याङ्ग्रापालन गर्ने गरेका छन् भने पछिल्लो समय च्याङ्ग्राको रौँबाट पश्मिना उत्पादनतर्फ पनि आकर्षण बढ्न थालेको छ । सूचीकृत किसानलाई विभिन्न शीर्षकमा अनुदान सहुलियत दिइने कार्यक्रम सञ्चालनमा रहेको राष्ट्रिय कृषि आधुनिकीकरण कार्यक्रम कार्यान्वयन एकाइ, मुस्ताङले जनाएको छ ।
बुधबार, भदौ ११ गते २०८२
Aug 27 2025 Wednesday
